Co gallo do Día Internacional para a Eliminación da Violencia contra á Muller, hoxe 25 de novembro, as entidades que forman Down Galicia veñen de estrear a través das súas redes sociais un vídeo reivindicativo contra a violencia machista.
Realizado coa coordinación do Grupo de Vida Independente da Federación, o vídeo pretende ilustrar os diferentes tipos de acoso e menosprezo que pode vivir a muller no seu día a día polo mero feito de selo, así como chamar á empatía dos homes e a sociedade en xeral, para que sexan aliados nesta loita e non caian na complicidade nin no acoso.
O vídeo foi gravado en diferentes cidades do país coa participación activa das persoas usuarias e profesionais da Área de Vida Adulta e Independente de Down Vigo, Down Pontevedra Xuntos, Down Compostela, Teima Down Ferrol, Down Lugo e Down Coruña. En total, máis de medio cento de persoas das entidades estiveron involucradas na coordinación e interpretación desta peza audiovisual reivindicativa.
