“… limpar o brócoli quitándolle os tallos grosos…, pelar e cortar os allos…; mentres nunha pota poñer auga a ferver cunha culler de sal …”
Así comeza unha das sinxelas e saudables receitas que elaboran semanalmente as persoas participantes no programa de Autonomía Doméstica de Down Lugo.
Un programa que leva en activo dende fai máis de 13 anos e no que actualmente un total de 17 persoas con síndrome de Down e outras discapacidades intelectuais entran na cociña da Asociación en pequenos grupos e se poñen mans á masa.
Cada semana, un/ha dos cociñeiros/as do grupo escolle unha receita para posteriormente, xunto cos seus compañeiros e compañeiras, elaborala cos ingredientes que compran no supermercado da zona. Ademais das tarefas propias da receita como cortar, pelar, lavar, fritir, cocer … repártense outras tarefas como poñer a mesa, fregar a louza, pasar a fregona ou limpar a vitrocerámica, por exemplo.
O principal obxectivo do programa é que as persoas participantes adquiran as habilidades, destrezas e os coñecementos básicos necesarios para desenvolverse con autonomía nas tarefas do ámbito doméstico, pero, en realidade, participar neste programa ten moitos máis aprendizaxes que os meramente domésticos.
Á hora de cociñar póñense en práctica outros coñecementos e habilidades como a lectoescritura, a comprensión lectora, o cálculo, a capacidade de organización … e cada día se reforzan valores tan importantes como a responsabilidade, o traballo en equipo, a tolerancia, a paciencia, o respecto ou a prudencia.
E que, sen dúbida, nas actividades cotiás que nos permiten experimentar en primeira persoa, como é a cociña, aprendemos grandes leccións.
Ahhh!!! Sona o timbre da vitro! … Toca probar a receita!
