“No camiño da inclusión, tod@s compartimos viaxe” é o lema co que as entidades Down en Galicia e La Voz de Galicia poñen á venda un parasol de aluminio para coche con motivo do Día Mundial da Síndrome de Down de 2024.
A venda deste produto ofrece a todas aquelas persoas que o desexen a oportunidade de colaborar de forma directa cos programas de inclusión e autonomía persoal que desenvolven as entidades Down en Galicia.
Deste xeito, toda aquela persoa que estea interesada en adquirir este parasol debe reservalo no seu quiosco máis próximo desde o luns 11 ata o xoves 14 de marzo, para poder recollelo entre os días 18 e 24 de marzo por tan só 4,95€.
Este parasol, con dobre cara de aluminio, ten unhas medidas de 130×65 cm. e conta con dous orificios de aceiro inoxidable en ambas esquinas superiores para a colocación das ventosas de suxeición á lúa do vehículo, aínda que tamén pode ser amarrado coas viseiras do mesmo. Dispón tamén de dúas gomas elásticas incorporadas para poder enrolalo e gardalo.
Ademais, presenta un atractivo deseño que busca implicar a toda a sociedade no obxectivo de incluír ás persoas coa síndrome de Down en tódolos ámbitos da vida. Porque depende de todas e de todos que poidan participar de forma activa, como unha persoa máis, de todas aquelas actividades que conforman o noso día a día: aprender na escola, xogar, saír, traballar… O obxectivo está nas nosas mans. Fagámolo posible!
Como cada ano, esta campaña pretende, principalmente, concienciar á sociedade e permitirlle aportar o seu gran de area para que as persoas coa síndrome de Down conten cos apoios necesarios e coas contornas adecuadas para levar unha vida autónoma, formando parte da súa comunidade de forma visible e activa, e demostrando as súas capacidades.
Esta iniciativa solidaria é posible grazas á colaboración desinteresada de La Voz de Galicia, que doará a Down Galicia o beneficio íntegro de cada parasol vendido co seu xornal.
