A inclusión social é un proceso que busca garantir que todas as persoas, independentemente da súa orixe ou condición social, teñan acceso aos recursos e oportunidades necesarias para participar na sociedade e realizarse como persoas. É dicir, sen importar as súas características persoais, as súas habilidades, as súas necesidades e/ou se ten ou non discapacidade.
Por tanto, a inclusión é un enfoque que responde positivamente á diversidade das persoas e as diferenzas individuais, entendendo que non son un problema, senón unha oportunidade para o enriquecemento da sociedade a través da participación activa de todas as persoas na vida familiar, no ámbito educativo, no laboral e, en xeral, en todos os ámbitos sociais, culturais e da comunidade.
En definitiva, a inclusión permite a participación activa e a igualdade de oportunidades de todas as persoas, eliminando as barreiras actitudinais, comunicativas, arquitectónicas ou cognitivas.
Dende a súa constitución, a Federación Down Galicia e as súas entidades membro, definiron un modelo de traballo propio, marcado, sobre todo, polo compromiso social a favor da inclusión e pola participación social e a promoción da autonomía persoal das persoas coa síndrome de Down e discapacidade intelectual.
Na definición deste modelo, tivéronse como referencia 3 piares fundamentais, que guían o traballo do Movemento Down en Galicia:
- A Convención de dereitos das persoas con discapacidade, que define a discapacidade como o resultado da interacción entre esta e as barreiras sociais que dificultan a participación plena, e reafirma que todas as persoas deben poder gozar de todos os Dereitos Humanos e liberdades fundamentais.
- O modelo social da discapacidade, que, fronte ao modelo clínico que centra a discapacidade nas limitacións individuais, destaca a interacción entre a persoa e o seu ambiente, considerando capacidades e fortalezas e introducindo a idea de apoio para superar ou eliminar as posibles dificultades.
- O modelo de calidade de vida, que ten en conta o conxunto de condicións que contribúen ao benestar persoal e social: benestar físico, benestar emocional, relacións interpersoais, inclusión social, desenvolvemento persoal, benestar material, autodeterminación e dereitos.
O sentido principal da definición deste modelo vén dado pola necesidade de establecer unha serie de criterios de actuación básicos para garantir a coherencia, eficacia e éxito das actuacións que se desenvolven dende o “Servizo de Promoción da Autonomía Persoal” das entidades Down en Galicia.
Deste xeito, á hora de definir as nosas actuacións e os nosos servizos, tratamos de asegurar que estean aliñadas coas seguintes premisas e ideas clave:
- Garantir a igualdade de oportunidades das persoas, traballando coa súa contorna para que sexa accesible.
- Favorecer a participación nos recursos e actividades existentes para toda a poboación.
- Promover a accesibilidade e o deseño universal para todas as persoas.
- Reivindicar e traballar para que todas as persoas, con independencia das súas características persoais, poidan gozar de todos os dereitos humanos e liberdades fundamentais.
- Promocionar a vida autónoma, a independencia e o poder de decisión da persoa.
- Traballar dende a planificación centrada na persoa, deseñando itinerarios personalizados no que cada persoa identifique as súas metas, e favorecendo a calidade de vida familiar.
- Maximizar as capacidades e oportunidades das persoas.
- Poñer o foco da discapacidade no contexto, e non na propia persoa.
- Centrar a relación da persoa co ambiente que a rodea, no que poida participar e relacionarse.
- Fomentar cambios que a sociedade debe levar a cabo para eliminar ou minimizar as barreiras en termos de actitudes e comportamentos, apoio social, información, estruturas físicas, etc.
- Sensibilizar á sociedade na necesidade de apoios naturais para superar ou eliminar as diferentes barreiras.
- Prover apoios personalizados ao longo de toda a vida.
Consulta a infografía sobre o modelo de inclusión e promoción da autonomía personal das entidades Down.
Contigo podemos máis!
